Henkeman
Zo neumt um iedereene. Hoo hee an den naame kump wet gin mense, maor'k denke dat um zien mooder al zo neumen tonne nog in de weege lag .'t Is ne besten kearl, maor...noh ja, wal'n betken ne Henkeman. Ziene Dina is neet van gistern en daor heffe volle steun an. At ut mot dan kaart Dine deur. At Henkeman pröt van ja ja, dan zee Dina....wi'j doot ut zo!! Awwe vrogen...woj de varkene nog neet kwiet dan zea Henkeman......ja....ja ....ja....dan zea Dina: Wi'j doot ze weg.
Zo was ut ok e'gaone met den beer. Zee hadden ne joekel van ne beer en Dina had ovverneard datte endelijke weg mog. Den beer worden verkoch en zee moggen um maondag brengen an de waoge. Varkene wegbrengen was vrogger neet zo'n spil maor zonne beer was'n heel gedoote. Hoo kriej ne beer van dikke zevvenhonderd pond op den bolderwagen? Varken dee gooi i'j der zo met 'n paar naobers op maor zonne beer? Henkeman was den naobersschop rond e'west umme te vraogen of ze helpen wollen. Natuurlijk wollen ze dat wal en 's maondagsmorgens umme zes uur wazzen ze der. De bolderwagen worden veur de schoppendeure zat. Daor worden 'n zwaor bröd teggenan e'zat en daor mog ut varken an op e'drevvene worden.'t Genk neet van zelf, met völle gedruk en schoeven ovver ut bröd, gestönnik en gevleuk zat den beer endelijke op 'n wagen. 'Den beer was op zienen olden dag tamelijk röstig anders had ut nog wal völle gekker können gaon. Ton'n wagen wear dreaien en dan ut peard der veur. Den groten joekel van ne beer keek hoge ovver de bröo hen en i'j moggen maor hoppen datte neet in de kop kreeg umme der ovver hen te springen. Hee genk op konte zitten en zat as ne keizer op ne troon. Noh, vooruit, ut peard keek wal luk schichtig achterumme, moar daor trok Henkeman zich niks van om. Twee naobers zollen met gaon want i'j konnen nooit weten watter onderweg gebeurn. Dina gaf alle naobers nog effen ne boddel veur't helpen en ton op weg. Earste deur den ongelukkige zandweg met dee grote knikgeatere. Henkeman veur op 'n wagen en de beide naobers der an wearskanten naost, ieders met ne grote pietske in de hande umme daor den beer met in bedwang te holl'ne...Maor dat veel met. 'n Beer von ut schienbaor wal 'n mooi geschommel. Hee keek wal ovver 'n rand hen en zat te sjapkene dat ut schoem rond vloog maor wieters genk alles good. En ton ze endelijke op de grinte wazzen kropen de naobers maor achter bi'j op 'n wagen en ton op darp an. 't Is altied nog 'n heel ende maor nao zonne dree kwarteer wazzen ze an de waoge.
Der wazzen natuurlijk heel wat meer boern en Henkeman hadde met ziene groten beer heel wat bekieks. En maor ovvernearn wat dat dier wat weagen kon. De boern wazzen an 't schatten en 'n eene dach dat'n beer nog zwaorder zol wezzen dan de anders.'t Is ne helen keemel. Per pond brech joo zonne olden beer neet volle op maor deur de völle ponde zol ut nog wal met vallen. Met alle boern der umme hen worden hee in de bascule daone en iedereene keek hoovölle punders der op gengen en net zo as iedereene al dag hee woog dikke zevvenhonderd pond. Verduld de möite weard. 't Peard worden weg e'zat en Henkeman en de beide naobers gengen de harbarge binnen dee vlak bi'j de waoge ston. Henkeman zol zien geld kriegen en den koopman zat al an'n tööfelken oet te reaken watte betalen moch. Henkeman tractearn de naobers al vaste op ne boddel. Ton Henkeman zien geld kreeg kreege der van de koopman ok nog eene. Noo is Henkeman neet völle gewönd en hee begon al aardig giechelig te worden.
Ton tractearn de naobers ok nog op ne boddel. En ton Henkeman nog ne keere umdat den beer zo met e'voll'ne was. Hee wis zeker dat Dina zol zeggen: I'j heb de jonges toch wal tracteerd. Ton vonnen de naobers dat zee ok neet achter konnen blieven...want potverdikke, zo vaake kwam'm ze dan ok neet in darp en zeker neet met ear dree'n....Ton sloken ze der nog un paar nao binnen en ton wear op hoes an. Ton Henkeman op'n wagen kroop zonke al vrolijk....Wij zijn naar Parijs geweest....Daor wasse nog nooit e'west maor hee hadde in elk geval ut onbedwingbaore geveul datte der van mog zingen. Zee streken ut peard der eene an en daor kleppen zee op hoes an. Dat gehobbel ovver dee kinderköppe in de straote maken ut nog lustiger en met ear dree'n zongen ze daverend ut leed van Marie dee ne vri'jer hadde....Henkeman halen helemaol oet....An de bokse hadde gin kneupe en luuze....en inins veele haose oet'n wagen, stak zien'n kop ovver den rand en böööök daor goojen hee alles watte in de maage hadde ovver straote.....daor worden hee nog beroerder van en endelijke schoove onderoet en leet zich in 't stro zakken waor zostraks den beer zo fijn e'zeat'ne hadde.'t Stro was neet helemaol dreuge natuurlijk maor daor trok Henkeman zich niks van an. En nao effen snorken hee as ne....jao, haoste net as den beer zostraks.
't Peard kennen joo de weg...en ton ze bi'j thoes kwammen zongen de naobers nog en Mina ston ear achter 't hoes al op te wachten. Dina keek is ovver'n rand van'n wagen en zag Henkeman daor liggen. Gut zea ze: noo hej ne beer weg e'brach en i'j komt met ne olde zogge wear in hoes!