Paardenmarkt

Paardenmarkt

I'j hadden un geveul in ut heufd of der ne stuiter van de eene kante nao de andere kante rollen. Koppiene dat 't knappen. De andern moggen der umme lachen. Haj maor neet nao de Eunkse karmisse motten gaon. Daor hadden ze natuurlijk geliek an. Op de Eunkse karmisse kwam i'j der altied wal eene teggen dee ow neudig un glas bier moggen gewen of dee der eene van ow te good hadde. 't Was der altied gezellig. Schepel spöllen bi'j Paskert. 'n Olden Roelof ston soms in'n deurngank met ziene vioole en dan kwam ut volk van zelf nao binnen, 'n Optocht kwam der langs met volle bombarie. Arie van Putten met ziene koetsen veur'n met den Könning en de Köninginne rond.'t Was d'r gezellig. Maor ok bi'j Pass of bi'j Sikkink was der plezear en bi'j Mensink koj good eaten. Allemaole mooi maor aj dan'n andern dag wear rogge meajen moggen dan veel dat wal leggen. Of rogge inhalen of braoken. I'j zatten in'n bouw en dat was ne drokke tied en um dan duftug feest te hollen was neet zo gezond.

Nao de rogge moggen de knollen der in. As de sodemieter mest of aaleveurn en dan braoken. Neet te deepe bouwen, i'j moggen un bedde hebben veur ut knolzaod. Veur de stoppelknollen dee's'winters heel belangriek wazzen veur ut vee. Veur'n tiende augustus mog ut knotzaod der in zitten. Wee knollen wil eaten mot St. Jan neet vergeaten. En dat was 10 Aug. En'n tweeden woensdag in Augustus was der peardemarkt in Hengelo. De knollenmarkt. Jonges, dat was wat...nao de peardemarkt. Dan op de markt kwammen de vullens dee van 'n olden af kannen op de markt . En de anderhalf jörigen, de vullens van ut veurige jaor.
Nao de peardemarkt daor mowwe hen. As jonge kocht i'j natuurlijk gin peard maor de knollenmarkt was nao'n drokten van'n bouw en 't knollenzeajen ne prachtigen oetgaonsdag. Dus met de kammeröö veur dag en dauw op de fietse op

Hengel an. Aj noo van hier oet achter deur 't Woold op 't Walfort an en dan waor noo'n watertoorn steet den Romienendiek ovver gaot dan buj ok nog zo ne keere bi'j de Radstake, vandaor'n Heelweg deur en dan zo op Malle en zelhem an en dan waj ok nog zo ne keere in Hengel. Daor was ut mi'j al ne drokten van geweld.

Rondumme de karke en de andere straoten ok ston ut ate vol pearde. Olden met vullens , anderhalfjöörigen, vösse, zwarten en wieters alle soorten pearde dee der maor wazzen. Ik zea al, ut genk uns meer umme den oegaonsdag as um den peardehandel. Al leepe wi'j der wal met'n wies gezichte achter hen, ston'n te kieken atter leu an't handelen wazzen. Probearn der achter te kommen umme wat veur geld at ut. Bewondern ut geschreeuw en gekeakel van dee kearls . Gengen nog effen ovver de gewone markt, daor stormen ze met allerhande landbouwgereedschap as grepen, schuppen, pannen en batsen, klompe en meolscheppers, katrollen en touwwark, i'j konnen ut ow neet zo gek neet bedenken of ut was der en gengen tenslotte un café in umme wat te drinken en daor bi'j unze botterham op te eaten. Umme in zo'n café wat te eaten dat was der neet bi'j. Buj wiezer, daor haj toch gin geld veur. Ondertussen wazzen ze al met pearde wear an't in laa'n in'n vrachtauto. Un stel jongens bonden luk pearde an de sterte an mekare, gengen der op eene opzitten en dan reden ze nao hoes .'t Was ne mooien leavendiggen dag. Prachtig, nog gauw'n paar glaaze bier en dan op wear op hoes an. Nao al dat bier en 'n drokken dag peddelen wi'j heel wat minder jachterig as's morgens. Argens in Malle vlak an de weg laggen un paar mooie deerns op ut land te weene. Natuurlijk wawwe in ne jolige bujje en mien'n kammeraod kon neet laoten umme nao de deerns te schreeuwen: Hallo.....weet je nog van toen...???Natuurlijk, schreeuwen ze wearumme....Ik von ow ne dreugen hork !! Noh, daor kon ut Jan met doo'n...'t Is altied nog ne leuke herinnering an ne mooien dag.