Zelfreflectie
Ut is mien wat; den pandemie maakt wat te doene. Zo denk iej dat t’r licht an t’ende van de tunnel gloort en zó geet ons de lampe hoast weer uut: delta gooit roet in t’etten.
Wie’j zaten zo te verlangen noar versoepeling die moar nieet afgekondigd worden, doar zol iej hellig van worden. De hele samenleaving wist wel zeker dat ’t hoge tied wier dat de tied van feestvieren en met vakantie goan weer kon anvangen, behalve diegene die ut veur ut zeggen hebt.
Wat een stelletje lamstroalen, bangerikken en dwarsliggers doar in Den Haag, kiek dan better noar de cijfers en getallen van de deskundigen en de ziekenhuuze of anders noar ut butenland, in Frankriek is de horeca al lange weer los en in Engeland schaft ze alle moatregelen weer af.
In Portugal en delen van Spanje is d’r wat fout ‘egoan, ik wet nieet krek wat, moar de kleur op de landkaarte is te donkerrood, al hoewel mien buurluu doar eur vakantie heb deur ‘ebracht. Dat sturmken carantaine in de baas zien tied hadden zie d’r wel veur oaver en eur vieftienjeurige dochter knappen langzaam moar zeker wel weer op van ut opgelopen virus, al mocht ze now niet gevaccineerd worden; ut dansen met Janssen mot effen uutgesteld worden. Den uutsproak wordt minister Hugo nog lange noa ‘’edrag, denk iej ok niet? Moar, in dezelfde persconferentie zeien beide heren dat de hande gewassen en ontsmet mot worden op anderhalve meter en in openbare gelegenheden mot…, dat heb ik niet goed ‘eheurt of ik heb niet goed ‘eluustert.
Eindeluk kwam ut verlossende woord, en wiej stoaven ut terras op en ut vliegtuug in en de weg op; wiej stonden goddank weer in de file en konden weer noar kantoor um mekare weer te sprekken en gezellig te vergaderen, al was de kantine te krap veur de anderhalve meter afstand, moar… allá.
Moar, nét now ik uutgeneudigd heb veur mien verjoardag goat de cijfers en de verwachtingstabellen de verkeerde kante uut; de besmettingen stijgt verontrustend en de festivals en bloemencorso’s en de dorpsfeesten bunt verdammie al weer afgelast. De organisatoren hellig dat ze zich veur niks hebt uut’esloofd en eur geld e‘spendeerd hebt.
Konden die oetlullen doar in Den Haag now niet better inschatten dat de versoepelingen deze gevolgen zollen kriegen; de jongeluu waren niet meer te holln en eur olders zeiden: … ze bunt moar één keer jong en de grieze duufkes koerden net zo met.
De tweede kamer kwam terugge van reces um de beide heren effen duftig de oorne te wassen, de les te leazen, de konte vol te schelden en de dood van enkele duzende extra dooien in de schoene te schoeven; um effen te informeren of de verantwoordelijke luu eur verantwoordelukheid wel nammen.
Niet dat de beweagingsvrijheid mot worden beperkt, nee, de economie mot wel draaien en de voetbal mot rollen, moar de controle is beneden peil want het ent-bewies is te downloaden en de Janssenbescherming duurt te lange en de sneltest is niet waterdichte; dus wordt ut hoge tied dat de heren an zelfreflectie goat doen en excuses maakt. Wiej zit niet te wachten op zulke gevolgen van versoepelingen en beperkingen die niet wordt noagekommen; al bunt de ‘heren’ demissioneer (butenspel ‘ezet ), ut virus bliekboar niet.
Veronderstel dat t ‘r nog nieje verkiezingen neudig bunt en de ontkenners van de pandemie en de betweters met de grote b…. beschuldigingen de dienst uut maakt, dan is onze samenleaving ok tooe an zelfreflectie.
G.H.
geertholterveld@gmail.com